18:24 Մարինե Զաքարյանի «Կիսալուսնի ծովածոցը» ֆիլմը |
 Վիլյամ Սարոյանի չորս պատմությունները միավորվել են ռեժիսոր Մարինե Զաքարյանի «Կիսալուսնի ծովածոցը» ֆիլմում, որը մեծանուն գրողի 105-ամյակին ընդառաջ կհանձնվի հասարակության դատին: «Ամբողջ աշխարհը և բուն իսկ դրախտը», «Մաղադանոսի այգին», «Փասիանի որսորդը», «Ծննդյան տոներից երեք օր հետո» պատմվածքները բավականին փոփոխվել են՝ հարմարեցվելով ֆիլմին, սակայն պահպանվել է դրանցից յուրաքանչյուրի սյուժետային գիծը: «Մեք սկսել ենք նկարահանել ֆիլմը ցանկություն ու երազանք ունենալով, որ այն պատրաստ կլինի Սարոյանի 105-ամյակին՝ օգոստոսի 31-ին: Եթե ամեն ինչ լավ դասավորվի, հուսով եմ կհասցնենք»,- esyes.am-ի հետ զրույցում ասաց Մարինե Զաքարյանը: «Կիսալուսնի ծովածոցը» երազանքների այն իդեալական քաղաքն է, որը ժամանակից և տարածությունից դուրս է. «Վայրերը հայկական անուններ ունեն, սակայն դա Հայաստան չէ, դա որևէ տեղ չէ: Դա Կիսալուսնի ծովածոցն է»:  Թեև պատմություններն առանձին են, չորսն էլ իրար լրացնում են և մի գաղափարի ծառայում: Պատմությունը սկսում են հայր և որդի, ովքեր գնում են գտնելու ճիշտ մարդկանցով ապրող մի վայր, որտեղ ապրելով իրենք էլ կսկսեն ճիշտ ապրել: Հաջորդ երեք պատմություններում երևում են այդ մարդիկ: Ֆիլմի վերջում տեսնում ենք, որ այդ մարդկանց ապրած ճիշտ կյանքն անդրադարձել է նաև առաջին պատմության հերոսների վրա և իրենք էլ են ճիշտ քայլեր անում: Այս ամենի շարժիչ ուժը երեխաներն են: Ամենափոքր հերոսը հինգ տարեկան է: Ֆիլմում նկարահանվել են 5-14 տարեկան երեխաներ ու պատանիներ: Նրանց ծնողներին և նրանց հետ առնչվող հերոսներին մարմնավորել են Կարեն Ջանիբեկյանը, Սոս Ջանիբեկյանը, Աշոտ Ադամյանը, Նարինե Գրիգորյանը, Արայիկ Սարգսյանը և այլք: «Ըստ մեր չափորոշիչների ամենալավ ու անկեղծ դերասաններին ենք ընդգրկել»,- ասաց ֆիլմի ռեժիսորը:  Սյուժեում դերասանները կրկնվում են, նրանք մի ֆիլմում կարող են էպիզոդիկ դեր խաղալ, մյուսում՝ գլխավոր հերոսին մարմնավորել: Օրինակ Սոս Ջանիբեկյանն աշնան պատմության մեջ հոր՝ Կարեն Ջանիբեկյանի հետ է խաղում: Ֆիլմում ևս նրանք հայր և որդի են. Կարեն Ջանիբեկայնի դերակատարն աշխատում է բենզալցակայանում, իսկ որդին՝ Սոսի դերակատարը, բարմեն է, ով աշխատանքից հետո պարբերաբար գնում է հոր մոտ, օգնում նրան, մթերք տանում և վերադառնում քաղաք: Նրա կերպարը զարգանում է ձմռան պատմության մեջ, որի գլխավոր հերոսը նույն բարմենն է: Գարնան պատմության մեջ էլ Կարեն Ջանիբեկյանն է առանձին հանդես գալիս: Ի դեպ, ֆիլմը սկսվում է գարնան պատմությամբ, որը վերջինն է նկարահանվելու: Ստեղծագործական կազմն այժմ սպասում գարնան գալստին:  Այժմ ստեղծագործական կազմը փորձում է ընտրել ֆիլմի երաժշտությունը. «Բավականին բարդ է: Ուզում ենք այնպիսի երաժշտություն լինի, որը համահունչ է և՛ Սարոյանի խոսքին, և՛ մեր պատկերաշարին: Պարզ, մաքուր և բնական երաժշտություն ենք ոււզում»: «Կիսալուսնի ծովածոցի» պրոդյուսերը Հովհաննես Գալստյանն է: Նկարահանումները նախատեսում են ավարտել ապրիլի 15-20-ը: Շնորհակալություն ենք հայտնում esyes.am-ին նյութի և նկարների համար: |
|
|
| Մեկնաբանություններն ընդամենը՝: 0 | |